مرثية،،

في ليلة زفافي، تأملت ماذا لو كانوا احياءًا يشاركونني هذه الفرحة الاستثنائية، كيف ستكون المشاعر؟ وكيف ستصبح اللحظة ♥️

يا شعيّع القلب من بعدكم محروق

حرقه شعاعٍ من عثى الوقت فـيني

كنت أتمنى تلبسين الهنى طـوق

وتباركين العمر، وتباركــيـنـي

كن الفرح من بعدكم منسرق سرق

عزّي لحالٍ هيض الشعر فيـني

ليتك حضرتي، وكان في فرحنا فرق

ضحكة، ودعوة ، وذكريات وحنيني

ويا دعيج، يا بسمة كما مبسم البرق

ليتـك معي، ببشتك، وفرحك مبّيني

دعوة سميرة كانت لعمري اشروق

صار الدعاء، وصل وشفاء لحنيني

ليه العمر من دونكم ناقصٍ طرق

وليه الزمان معييّن لا يليني

ليت الفرح فيكم كمّـل وأشرق

وليت المنى ما طال سمح الجبيني

عزاه يا وقتٍ سرق ضحكتي سرق

عثرّ مع دموع الحناجر ونــيـني

ليت الزمن ما حرّ في قلوبنا حرق

واستغفر الله من عثى الوقت فيني

الله عطى امر المُحبين من فـوق

فيها ثواب وصبر وأجر السـنيني

كل يوم يعدّي يحرق القلب ويموق

وكل يوم يعدّي يجبر الله حـنيني

نامي قريرة عين يا حبة الشـوق

نامي وخلّي حرقة القلب فيني

ليت الوداع، وليت ما كان مخلوق

ليت العمر، ماشي معاك بحنيني

متوا وعشت العمر اطيح وافوق

وأقول باقي يا سبايب ضنيني

تدري وش الي يجبر القلب ويروق؟

لا من تذكرت الله ورحمـته فيني

شوفتك يا عمشاء دواء كل مخلوق

وموتك قتل دمعاتي وذكرياتي وحنيني

أستغفر الله كان من حرّي امــوق

هذي المنايا وهذا قدر والله يعيني